السلام عليكم..

نبدا بالموضوع :@ << وخروا عنه معصب خخخ

لا من جد نيكون وش تحسين فيه؟؟

in English: WTF? = Wesh T7seen Feh

أنا معي مثل ذي ^^ اللي فوق الله يريحنا بس.. :/

..

طيب، عشان أكون واضح، هالكاميرا فوتوغرافياً من أفضل ما جربت، الشاهد نتائج تصويري الفوتوغرافي فيها (أتكلم هنا عن تقنيتها وناتج الصورة من نظافة ودقة بغض النظر عن جمال الصورة)..

لكني اليوم بتكلم عن الفيديو، وراح أحط لكم أمثلة من تصويرها..

طيب، تحبون نبدا بالشين أو الزين؟؟ ما أسمع! الشيـ؟ الزين خلاص طيب << بررا خخخخ

..

الزين فيها (من ناحية تصوير الفيديو طبعاً)

التصوير بالشمس، أو بالإضاءة الخارجية القوية جداً، تطلع معك نتائج مبهرة، مثل هالمقطع >>

(إذا تبغى تشوف النتيجة الصح، شغل الأتش دي، وكبر شاشة الفيديو)

طيب، الآيزو فوق 100، والتصوير مثل ما هو واضح، بالصباح الباكر مع الشروق، عدا اللقطة الأخيرة في الظهر، تلاحظون النقاوة، الصورة جدا صافية، وطبقت بعض التونز على بعض اللقطات، والدقة ما تزال حلوة والألوان واضحة، يمكن تستغربون إلين هنا إيش المشكلة، المشكلة في المقطع الثاني، تصوير ليلي >>

(إذا تبغى تشوف النتيجة الصح، شغل الأتش دي، وكبر شاشة الفيديو)

برضو الآيزو هنا 100، سنسور وسخ؟ لا! كنت توني مطلعها من الوكيل عبدالواحد جلست أسبوع كامل تنظيف وتلميع، القزاز نظيف في السيارة عدا بقعة موية ناشفة في اليسار، والعدسة نظيفة، طيب إيش المشكلة؟ هنا المشكلة بشكل أوضح

(لحجم أكبر، لا تضغط ع الصورة << مبدأ خالف تعرف خخخ)

^ الصورة هذي من المقطع المدرج فوق، لاحظوا النويز الخبيث في المنطقة السودا (العدسة: 24-120)

^ الصورة هذي في غرفة الكنترول أثناء بث الشاشة لك، لاحظوا النويز هنا بشكل فظيع جداً ! (العدسة: 50 ملي)

^ هذي كمان صورة قديمة من مقطع فيديو، لاحظوا النويز كذلك ! (العدسة: 50 ملي)

الآن، كل من له عقل ويفكر ويعرف أساسيات كرة البلياردو يكون عرف المشكلة ، المشكلة سلمكم الله، إن الكاميرا هذي بالليل ما تعترف باللون الأسود ههههههههههههههههههههههههههههه تقعد تلفق مكانه ألوان ثانية ونويز وشخابيط تتحرك أثناء الفيديو!

.

<< الحين وش يبغى ذا عبدالغني مسوي لنا قلق وزحمة وتدوينة عشان هالمشكلة!

<< إيوه يا حبيبي! من حقي كشخص مهتم بمجال الفيديو، وشريت الكاميرا بخمس آلاف إني أستمتع بتصوير فيديو نظيف! كان أحسن لو شريت كاميرا بدون فيديو ووفرت 3000 صح؟، طيب، كانون نزلت سلفاً 5 دي مارك 2، وهذي برا المقارنة لأنها فل فريم، نيكون نزلت هالكاميرا، وكانت كويسة أيامها، كانون جات نزلت 500 دي، 7دي، 550دي، ولسه نيكون تحك راسها!!!!!! ليش؟؟؟؟؟؟ طيب هذي الكانون نزلت 60دي كمان، ونيكون لسه دوووووبها تفكر بشي جديد اسمه دي7000! والله يستر لا تكون مقلب هذي الثانية << لسه مقروص خخخ

أنا مدري إيش السالفة، بس أعتقد إن نيكون توهقت، ولا عرفت تحط فل أتش دي، لأن الكانون 500دي، و550دي، سعرها جداً منخفض بالنسبة للدي90، وحجمها أخف من حجم عدسة الدي90، ومع ذلك نشوف فيها شغل سينمائي! موش معقول يا نيكون! هذا وأنا ماجبت لسه طاري السفن دي اللي بستين فريم والتصوير الليلي فيها متعة!

عيب والله يا نيكون!

..

عموماً، أنا حطيت حرتي بهالتدوينة، وأي واحد يسألني من الحين، نيكون ولا كانون الجواب بيكون كالتالي:

مستغني عن الفيديو تماماً؟ روح نيكون، تبغى فيديو يرفع الراس، كانون موجودة الله يرضى عليها..

أنا مدري، هل بيتغير رأيي بعد نزول النيكون الجديدة D7000، خاصة إن نيكون مسويه لها حملة في فوتوكينا مثل ما صور لنا الأستاذ حسين دغريري

تحفة النيكون الجديدة في ثوبها السينمائي
D7000
أتت هذه الكاميرا في منافسة شرسة مع 7D من كانون ..
ويتوقع أن تسحب البساط بسهولة منها نظرا لما تحويه من مواصفات

..

وكما قال الشاعر: الأيام حبلى بالمفاجآت خخخ

..

الزبدة، بسبب اللي فوق ^^ وبسبب هذا المقطع الرائع اللي استخدمت فيه الكانون 7D، من تصوير الرائع إياس السحيم وإخراج الرائع عبدالعزيز الشلاحي، حبيت أقول لكم إن الوجهة القادمة Canon 7D بإذن الله، بس دعواتكم تتيسر

تحياتي لكم